Би “Шинэ эдийн засаг” хэмээх орчин үеийн эдийн засгийн шинэ хандлагын талаар өгүүлсэн бүтээлээ саяхан гаргалаа.
Хүн төрөлхтөн улам бүр даяарчлагдаж, тогтвортой хөгжлийн үзэл санааг нийтээр баримтлах боллоо.
Дэлхийн хүн ам, эдийн засаг, үйлдвэрлэлийн өсөлтийг дагаад хоол хүнс , материал түүхий эдийн эрэлт өдрөөс өдөрт нэмэгдэж, байгалийн нөөц боломжийг эрчимтэй дайчлах шаардлагатай болж байна.
Хүний үйл ажиллагааны нөлөөгөөр байгаль ертөнцийн тэнцвэр алдагдаж, дэлхийн дулаарал, цаг уурын аюулт үзэгдлийн давтамж нэмэгдэж, хүн төрөлхтөн байгаль орчинд халгүй амьдрах хэв маягт шилжих шаардлага тулгарч байна. Энэ цаг мөчид шинэ эдийн засгийн сэтгэлгээ онцгой ач холбогдолтой болж ирлээ.
Энэхүү бүтээлдээ би хүн төрөлхтний хөгжил дэвшлийн ололтод тулгуурласан шинэ эдийн засгийн хэлбэр болох “Тойрог эдийн засаг”, “Дижитал эдийн засаг”, “ Хуваалцах эдийн засаг”-ийн ойлголт, ач холбогдол, шинэ эдийн засгийг нэвтрүүлж байгаа салбарууд, улс орны туршлагыг дэлгэрэнгүй авч үзэхийг хичээлээ.
Шинэ эдийн засгийн төрлүүд, түүний агуулга нь мэдлэг, ухаалаг чанар, арвич хямгач хандлага, хаягдалгүй технологи, үр ашгийн мөн чанарт тулгуурлаж байна.
Улс орон бүр шинэ эдийн засгийн зарчмыг ажил, амьдралдаа мөрдөхдөө иргэд уламжлал болон хэвшсэн үрэлгэн сэтгэлгээ, зан заншил, соёлын дадал зуршил, аж ахуй, эдийн засгийг эрхэлж ирсэн үр ашиггүй хэвшлээ халах шаардлага үүсэж байна.
Дэлхий нийтээр аж үйлдвэрийн дөрөв дэх хувьсгал, дижитал шилжилт нэвтэрч биеийн хүчний хөдөлмөрийг оюун ухаан, мэдлэг зонхилсон хөдөлмөрийн харилцаа давамгайлж, хиймэл оюун ухаан, робот техник, программ хангамж, онлайн үйлчилгээ, блокчейн технологи, крипто валют зэрэг шинэ, шинэ ухаалаг үйлчилгээний төрлүүд ажлын байрыг эзлэх боллоо.
Номондоо энэ талаар тодорхой жишээ баримттай, хүмүүст ойлгомжтой энгийн хэллэгээр бичихийг хичээлээ. Монголчуудыг шинэ зууны амьдралд сэтгэл зүйн хувьд бэлтгэх, төр засаг, аж ахуйн удирдлагууд, эрдэмтэн судлаачдыг энэхүү асуудалд анхаарлаа төвлөрүүлэхэд тус дэм болно гэж үзэж байна.