BOOK.MN | Номын зохиолч Бүдбазар Гомбосүрэн

Бүдбазар Гомбосүрэн

ЭМШУИС-ийн АУС-ийн уушигны эмгэг судлалын тэнхимийн багш, АУ-ны доктор, профессор. XVI жарны ""Баясгалан" хэмээх Эр усан луу жилийн Намрын дунд сард Засагт хан аймгийн Сартуул цэцэн вангийн хошуу, эдүгээгийн Завхан аймгийн Эрдэнэхайрхан сумын нутаг Бага нуур багийн "Таравжийн ар" хэмээх газар төржээ. 1977 онд АУДэС төгсгөн хүний их эмчийн мэргэжил эзэмшиж улмаар эх орондоо дотор ба уушигны эмчийн мэргэжил олгох, дээшлүүлэх дамжааг дүүргэн, ОХУ-ын Москва, Санкт-Петербург хотод уушигны эмгэг судлал, дуран, үйл оношийн чиглэлээр нарийн мэргэжил эзэмшсэн. 1992 онд Санкт-Петербург хотын акад. И.П. Павлавын нэрэмжит АУИС-ийн уушигны эмгэг судлалын эрдэм шинжилгээний институтын эрдмийн зөвлөлд "Гуурсан хоолойн тэлэгдэх өвчний тархалт: Эмнэлзүй-дурангийн оношлогоо, эмчилгээ" сэдвээр Анагаах ухааны докторын зэрэг хамгаалж, энэ хугацаанд ард түмнийхээ эрүүл мэндийг сахин хамгаалах, Монгол улсад эмнэлгийн дээд мэргэжилтэй боловсон хүчин бэлтгэх, тэдгээрийг давтан бэлтгэх үндсэн ажлынхаа хажуугаар хот, хөдөөгийн эмнэлэгт тасгийн эрхлэгч, ерөнхий эмч, Улсын I ба II төв эмнэлэгт зөвлөх эмч, ЭМШУИС-д тэнхимийн эрхлэгч зэрэг ажлыг гүйцэтгэж байсны дээр мэргэжлийн 10 гаруй сурах бичиг, гарын авлага, 70 гаруй эрдэм шинжилгээний илтгэл, өгүүлэл, эмчилгээний шинэ аргачлал 5-ыг эмнэлгийн практикт нэвтрүүлж, эдгээр бүтээлүүдээс Терапевтический архив № 3, 1999, Хронические обструктивные болезни легких (2000 г), Хроническая обструктивная патология легких у взрослых и детей (2004 г) зэрэг томоохон ном, сэтгүүл болон гадаадын хэд хэдэн диссертацад ишлэлүүд авсан байдаг нь түүний судалгааны ажлыг эерэгээр үнэлсэн үнэлгээ билээ.