Даланбалжиудын тулалдаанаас хойш 5 жил болоход Тэмүжиний мал сүрэг өсөж, эд баялаг нь арвижин, цэргийн хүчин чадал нь өсөж, авьяаслаг цэргийн жанжнууд ч бий боллоо. Татар нь Алтан улстай нягт холбоо тогтоосон байсан боловч дайнд олсон олзоо булаалцалдан тэдний хооронд зөрчил үүсэн дайтахад хүрчээ. Алтан улсын цэрэг Татарыг дангаар дийлэхгүй тул Татартай өстэй байсан Монгол аймгууд, түүний дотор Тэмүжинд хэл хүргэж, хүч хавсрахыг хүссэн байна. Тэмүжин эрт орой хэзээ нэгэн цагт Татаруудыг мөхөөнө гэдэг санааг сэтгэлдээ тээж явсан болохоор энэ далимыг ашиглан Татарыг бусадтай хамтран сөнөөх нь хожмын хэрэг болно гэдгийг тооцсон бөлгөө.