Тэмүжин хамаг Монголын хаан болж, Хиад боржигон овгийнхон төрийн нэгэн жолоонд нэгдэж орсноор Монгол нутагт ван хан Тоорил тэргүүтэй Хэрэйд аймаг, Жадаран овгийн Жамуха, Хиад боржигоны Тэмүжин гэсэн гурван хүчин зэрэгцэн орших болов. Тэмүжиний хүчирхэгжиж байгаад Тайчуудаас эхлээд түүнд дургүйцэх хүчин олширч эхэллээ. Хамаг Монголын хаан ширээг битүүхэндээ мөрөөдөж байсан Жамуха ч Тэмүжинг өсөж бэхжихээс нь өмнө нуга дарах сонирхолтой байв. Жамуха дүүгээ алагдсаныг сонсмогц уур хилэн нь бадарч, өшөө авах зорилгоор 13 овог аймгийн гурван түмэн цэрэг цуглуулж Тэмүжинтэй тулалдахаар хөдлөв. Жамуха, Тэмүжин хоёрын дунд болсон энэхүү тулааныг Даланбалжиудын тулалдаан гэдэг.