Хорвоо ертөнцийг хашааны цаанаас модны хөндийгөөр ажиж буй мэт санагдах юм”
Бүх зүйл чиний эсрэг мэт хорвоо ертөнцөд хэрхэн амьдрах вэ? Итгэл найдвар тээх үү? Айдаст автах уу? Эсвэл хүч хэрэглэн тэмцэх үү? Зохиолч Ричард Райт хүүхэд насныхаа дурсамжуудыг Чикагогийн ядуусын хороололд тарчигхан амьдардаг Биггер Томасын дүрд шингээн гаргасан уг бүтээл уншигч таны сэтгэлийн утсыг угз татаж, түгшээн үймрүүлж нэгийг бодогдуулна. Зохиолын гол дүр Биггер Томас хэмээх хар арьстай залуу нэгэн чинээлэг айлын охины үхэлд хутгалдсанаар үйл явдал цааш өрнөнө. Зохиолч энэ бүтээлээрээ дааж давшгүй бэрх дарангуйллын нийгмийн дүр төрхийг харуулахыг зорьжээ. Уг бүтээлд Биггер Томас хийсэн гэмт хэргээрээ бахархах хачирхалтай өнцөг гарч буй нь зохиолч уншигч биднийг шударга ёсны үнэн төрхтэй нүүрэлдүүлж буй хэрэг юм. Өөрөөр хэлбэл хүн шударга ёс үргэлж өөрийнх нь талд байх мэтээр сэтгэж сохор бодолтой явдаг ажээ.
Зохиолч Ричард Райт хүүхэд насаа Теннеси мужийн Мемфис хотод өнгөрүүлсэн бөгөөд дараа нь өнчин хүүхдийн асрамжийн газарт очсон байна. Мөн Райт хоёр талын хамаатан саднуудтайгаа амьдралынхаа багагүй хугацааг өнгөрүүлжээ. Тэрбээр энэ цаг үед туйлын бэрх амьдралыг туулсан ч багагүй туршлага сууж төлөвшсөн тухайгаа “Хар арьст хөвгүүн” хэмээх намтарчилсан зохиолдоо сийрүүлсэн байдаг. Ричард Райт 15 настайдаа гэрээсээ явсан бөгөөд 1934 онд Чикаго хотыг зорьжээ. Ийнхүү 1935 онд тэрбээр “Холбооны зохиолчдын төсөл” хэмээх хөтөлбөрт хамрагдан ажиллаж эхэлсэн байна. Түүний анхны ном болох “Том ахын хүүхдүүд” тууж, өгүүллэгийн түүвэр нь 1938 онд хэвлэгдсэн ба дараа жил нь тэрбээр Гуггенхаймын тэтгэлэг хүртсэн аж.
Ричард Райт баримтат бүтээл, роман түлхүү бичсэн бөгөөд эсээний түүвэр ч цөөнгүй гаргажээ. Тэрбээр бүтээлүүддээ голчлон арьс өнгөөр ялгаварлан гадуурхах үзлийг хөндөн бичихээс гадна африк гаралтай америкчуудын хүнд хэцүү амьдралын тухай өгүүлдэг байжээ. Үүнээс болж түүний бүтээлүүд ширүүн маргаан, мэтгэлцээн дэгдээж, шүүмжлэлд өртөх нь элбэг байсан аж. Ричард Райтын бүтээл туурвилыг дэмждэг нэгэн үеийн хамтрагч зохиолч Жэймс Болдуин хүртэл түүнийг шүүмжилж явсан үе бий. Тодруулбал, Ричард Райтын Биггер Томас хэмээх дүрийг Жэймс Болдуин хатуу шүүмжилдэг байжээ. Энэхүү номд Ричард Райтын “Хар арьст хөвгүүн”, “Унаган нутгийн хүү” номуудаас шилэн хэсэгчилж оруулав.