Хүн төрөпхтөн дэлхийн хүн амын хагасаас илүү хувийг эзэлдэг "Хүүхэд" хэмээгч гайхалтай шинэ ертөнцөд зориулж уран зохиолын онцлог сонин өвөрмөц, төрөл хэлбэрийг буй болгожээ. Монголын орчин үеийн хүүхдийн уран зохиол нь 1920-иод оноос эх үүсгэлээ тавьж 1950-1960-иад онд бие даасан салбар болон хөгжиж, 1970-1980 оноос сэдэв агуулга гүнзгийрэн баяжсан бөгөөд үе үеийн зохиолчдоос шижир алт мэт тунгаан цуглуулсан зохиол бүтээлийн алтан сан хөмрөг арвин их билээ.

Бидний эмхэтгэн хэвлүүлж буй энэхүү тайлбар толь хүүхдийн уран зохиолыг өргөн олны хүртээл болгох, бие даасан онол судалгааны салбар болгон хөгжүүлэх зорилготой бүтээсэн хүүхдийн уран зохиолын анхны тайлбар толь юм. Нэр томьёонуудыг зөвхөн судлаач бус энгийн уншигч ч ойлгохуйцаар аль болох дэлгэрэнгүй тайлбарлаж, жишээ баримтаар баяжуулахыг хичээсэн болно. Хүүхдийн уран зохиолыг дагнан судалсан МУБИС-ийн профессор Д.Оюунбадрах, "Уран зохиол"-ын нэвтэрхий толь /Уб, 2012/ зохиосон МУИС-ийн профессор Д.Галбаатар нартаа болон оноосон сэдэв боловсруулсан эрдэмтэн багш нар, шавь нартаа гүн талархал илэрхийлье.

Бүтээлийн агуулга нь хүүхдийн уран зохиолын онол, арга зүйг оюутан суралцагчдын хүртээл болгох, түүний онол практикийн асуудлыг их дээд сургууль, дунд боловсролын сургалт судалгааны ажлын туршлагад өргөн ашиглахад чиглэгдэнэ. Тайлбар толь нь гурван бүлэгтэй. Үүнд:

Нэгдүгээр бүлэгт хүүхдийн уран зохиолын онол, түүх, шүүмж, судалгааны нэр томьёо, ойлголтууд, тайлбарыг орууллаа. Эдгээр нь утга зохиол судлаач шүүмжлэгч, хүүхдийн зохиолч, их дээд сургуулийн эрдэмтэн багш нар, оюутан суралцагчид, ЕБС-ийн монгол хэл, уран зохиолын багш нарт нэн тустай юм.

Хоёрдугаар бүлэгт Монголын орчин үеийн хүүхдийн уран зохиолыг үндэслэгчид, гол төлөөлөгчид, хүүхдэд зориулан бүтээл туурвисан зохиолчдын товч намтрыг оруулав.

Гуравдугаар хэсэгт монголын хүүхдийн зохиолын алтан сан хөмрөгөөс дээжлэн таван тууж, нэг жүжиг, хоёр найраглал, 60 гаруй өгүүллэг, 80 гаруй шүлэг оруулав. Эдгээр нь хүүхдийн уран зохиолын онцлогуудыг харуулсан бүтээл тул судалгаанд хамруулах зорилготой сонгон авсан юм.