Энэ ботид орсон туужис уншигч та бүхэнд монголын орчин үеийн уран зохиолын хамгийн гол сэдэв болсон хүний мөн чанар, ёс суртахууны талаар таниулах болно. Яагаад чухам энэ үеэс манай уран зохиолд хүн чанарын тухай илүүтэй их бичих болсныг ч та эргэцүүлэн бодоорой. Ямар нэгэн учир шалтгааныг танин мэдэх болно гэдэгт бид итгэлтэй байна. Зохиолчид үнэхээр амьдарч буй цаг үеийнхээ хамгийн тод томруунаар харуулагчид байдаг. Тийм чанар ч энэ ботид сонгогдон орсон туужисаас ч харагдана. Дээр нь зохиолч бүхэн өөрийн арга барил, өвөрмөц бичлэгээрээ илт ялгарч байна. Зохиолч Д.Батбаяр, Б.Догмид, Д.Намсрай, Д.Норов нарын шилдэг туужисыг энэ ботид оруулсан нь нэг талдаа манай уран зохиолын хөгжил ямар хэмжээнд хүрсэн баталгаа төдийгүй тэдгээр зохиолчдын бичлэгийн онцлог, ур чадварын нууцыг харьцуулан харах сайхан боломж юм.

Нэг талдаа хүний амьдралын утга учир, гоо сайхан, хүн чанарын тухай өнөөгийн бидэнд ойлгуулах гэсэн чин хүсэл эрмэлзлээр дээрх зохиолчид бүтээлээ бичсэн байна. Тэд оюунаа шавхан, хүний тухай, хүний гоо сайхны тухай тийн шаналан бичсэний утга учир энэ ботиос мэдэгдэнэ. Мөн энэ ботиос нийгэм цаг үе бус харин хүний амьдралын үнэнийг харуулахыг зохиолчид бодох болсныг ч мэдэж болно. Ер нь энэ ботид олон олон асуулт бас олон олон хариулт оршиж байна.

Товчхондоо хүн хүнээ хайрлахын сайхан, өс хонзон, муу муухай зан чанар хожим ямар байдалд хүргэхийг, зовлон зүдгүүрийг даван туулахын хүч, итгэл найдвар, гэрэл гэгээ, хүсэл мөрөөдөл, ариун сэтгэлийн дуулал, баяр хөөр, гуниг гансралын шалтгааныг биднээс асууж, бидний хариултыг хүлээж байгаа зохиолууд энэ ботид багтжээ.

ХХ зууны монгол туужийн төрөлд томоохон шинэчлэл болсон хэмээн судлаачдаас өндөр үнэлэлт авсан зохиолч Дармын Батбаярын “Цахилж яваа гөрөөс” бус харин зохиолчийн нэгэн сонирхолтой бүтээлийг сонгон оруулав. Зохиолч Д.Намсрай “Цэцэгсийн нүүдэл”, Д.Норов “Сэрэвгэр хадны зэрэглээ”, зохиолч Г.Нямаагийн “Өртөө буюу дэр мод” зэрэг шилдэг бүтээлүүдийг ч та бүхэн уншиж ухаарах болно. Яагаад энэ ботид ийм туужисыг сонгон оруулсны учрыг уншиж дуусаад эргэцүүлэн сайн бодоорой. Та бүхэнд өөр өөрийн гэсэн дүгнэлт хийх эрх мэдээж нээлттэй байна. Энд л уран зохиолын онцлог, эсвэл уран зохиолын мөн чанар байдаг болов уу? Учир нь бидний сонголтоор энэ ботид орсон туужис зохиолчдынхоо уншигчид болон утга зохиол судлаачдаас өндөр үнэлэлт авсан бүтээлүүд байгааг та гарчгаас хараад шууд ойлгоно. Хэрэв та одооноос л Монголын уран зохиолыг, тэр тусмаа туужийн зохиолуудыг уншиж мэдрэхийг хүсэж байвал ямар ч байсан зөв чиг болно гэдэгт бид итгэлтэй байна.

Уран зохиолын залуу авьяастан, залуу судлаачид ч туужийн төрөл, түүний бичлэгийн онцлогийг ч нарийн судлах, суралцахад ч манай хэвлэлийн газраас эрхлэн гаргаж буй энэ ботиудын ашиг тус багадахгүй болов уу?