Эрэлхэг зоригт гүнжээс их гүрнийг захирсан эрхэмсэг хатан болсон нэгэн бүсгүйн амьдралын түүхээс эрхэм уншигч та амьдралын үнэ цэнэ, цэвэр ариун хайр, үнэнч шударга зан, эрэлхэг зоригийг олж харах биз ээ. Эмэгтэй хүний хатан ухаан, эр зориг, сайхан сэтгэл хэрхэн бусдад нөлөөлж, бусдыг өөрчилж, хувь тавилангаа өөрчилж буйг энэ номоос олж уншаарай. 
                                                                                       
                                                                               Гэнэтийн учрал
Нюмен улс хөл хөдөлгөөн ихтэй, энд тэндхийн жуулчид цуглах нь 3 жилийн хугацаа өнгөрөхд огтхон ч өөрчлөгдсөнгүй.
Угсаа залгамжлагч ханхүү энэ өдөр хотоор зугаалан ард иргэдийнхээ амьдралыг харахаар зөвхөн хамгаалагчаа дагуулан гарсан нь нэгэн гайхамшигт учралтай таарах юм гэж зүүдэнд ч орсонгүй. Ханхүү ордноос гаран задгай бараа зардаг газраар дайран ядуусын хороолол орох замдаа нэгэн танил царайг харан зог тусан зогсов. Форест улсын гүнж Сораннатай тун адил, хямдхан даашинзтай ч хээнцэр алхаатай, даруухан инээмсэглэлтэй нэгэн бүсгүй ханхүүг анзааралгүй хажуугаар нь өнгөрөх агаад түүний хажууд хамгаалагч нь гэлтэй том биетэй, бор царайтай, онигор нүдтэй нэгэн залуу явна. Ханхүү тэр бүсгүйг хараад гүйн очиж гараас нь барихад бүсгүй гайхан эргэн харж, түүний хажууд явсан залуу сэлэмнийхээ хуйнд гараа хүргэхэд ханхүүгийн хамгаалагч ч мөн адил хуйндаа хүрэн
-Эзэн ханхүүгээ таньдаггүй яасан тэрслүү амьтад вэ? хэмээн зандрахад бүсгүй хамт яваа залуудаа хандан 
-Ахаа хэмээн чанга дуугаар хэлэхэд залуу эр хуйнаасаа гараа авч ханхүү ч  мөн адил бүсгүйн гарыг тавилаа. Нөгөө үзэсгэлэнт бүсгүй ханхүүд мэхийн ёслоод
-Эрхэм дээдсээ, биднийг өршөө. Ядуу доод гаралтан бид эрхэм ханхүүг танилгүй ёс алдлаа гэхэд ханхүү
-Эрхэмсэг бүсгүйн алдрыг сонсож болохсон болов уу? 
-Миний нэрийг Саяа гэдэг эрхэм дээдсээ гэж бүсгүй зарц барлагуудаас тэс өөр нүүрэмгий хэлэв. Ханхүү бүсгүйн хэлсэнд  гайхан балмагдаж "Хорвоод усны дусал шиг адилхан хүмүүс байдаг аа" хэмээн бодоод 
-Саяа авхайг зөвшөөрвөл хэсэг алхах уу?