Хуншгүй баян эр, хувиршгүй сайхан сэтгэл
  Танилцаад төдий л удаагүй шинэхэн амрагаа хажуудаа суулгасан Гэрэлтуяа хүүхэн цоо шинэ мерседесенц машиныхаа жолоог чадварлаг залж хайрын дуу аяланхан туулын шугуй өгсөн давхих агаад Мөнхнасан нууц амрагынхаа торомгор алаг  нүд, урт сормуус, гоёмсог нимгэн цамцны цаанас төмбийх мээм, ямар ч үрчлээгүй хунгийнх шиг цав цагаахан хүзүү юугий нь шүлэнгэтэн харж хорвоогийн сайхан хүүхнүүдийн нэгийг уургаллаа даа гэсэн юм бодож явлаа.
Гэрэлтуяа дуу аялан давхисаар зорьсон газраа хүрч машинаа бургасны сүүдэрт тавьж, голын зүлгэн дээр гоёмсог хийцтэй эрээн дэвсгэр дэвсэж, хэдэнтээ суниаж биеийн чилээ гаргаснаа түрүүлгээ харж хэвтэж, 
-Ундаа уухгүй бол хатаж үхэх нь гэж эрхлэх, тушаахын завсар өгүүлэхүйд түүнийг далайхад далд орж, даллахад ил гарахад бэлэн буй Мөнхнасан машинаас том эрээн тортой юм авч ирж дэргэд нь суугаад хоёр лааз кока кола ундаа задалж нэгийг нь түүнд барив. Гэрэлтуяа ундаагаа бага багаар шимэн ууж дуусаад лаазыг нь намуухан урсах Туул голын ус уруу шидэж орхиод харь газрын чамин хийцтэй цүнхнээсээ Камел тамхи гаргаж татав.
Ямар ч эр нүд алдаж байн байн эргэж хармаар гоолиг сайхан бүсгүйтэй нууц амрагийн жаргал эдэлж яваадаа сэтгэл ханаж ар гэр, авгай хүүхдээ хайхрахаа больж буй Мөнхнасан түүний хацрыг илж,
-Агь гангийн үнэр ханхлаад эндхийн агаар ямар сайхан юм бэ. Эгээ франц сүрчиг л гэсэн үг. Токиод хэд хонох гэж агаар дутагдаж бүгчимдээд сандарлаа гэж өгүүлэв. Гэрэлтуяа Мөнхнасангийн уруул дээр шовхийтэл үнсэж, 
-Гэнэт хөдөөлөх ажил гараад үдэж өгч чадаагүйг минь уучлаарай, гээд хүзүүгээр нь тэвэрч талимаарав.
-Юун сүртэй юм билээ дээ. Гададад бишгүйдээ л тэнэсээр байгаад үдүүлнэ, угтуулна гэдгийг тоохоо больчих юм байна шүү.