Томоо
- ISBN: 978-99978-59-24-2
- Хавтас: Зөөлөн
- Хэвлэгдсэн он: 2017
- Хуудас: 218
- Хэмжээ: 195*130мм
- Жин: 185
- Үлдэгдэл: Дууссан
Томоо
Бага насны тусмаа. Бяцхан байх тусмаа дурсамж хүний ой тойнд тод үлддэг аж. Цаг хугацаа урсах тусам үнэ цэнэ нь нэмэгдэж байдаг байна.
Яг л нэг тийм хуучны чухаг эд, эдлэл шиг.
Шуудангийн марк шиг гэхэд ч хаашаа юм.
Цайны данх, хойморийн ширдэг шиг гэвэл ч бүр хаашаа юм.
Тэгэхдээ л бага насны дурдатгал тухайн хүний ой санамжийн хэсэг, үргэлжлэл. Ийм учраас тогтоосон үнэгүй атлаа хамгийн нандин өв хөрөнгө мэт санагдах нь буй.
Яагаад гэвэл нэгэнт өнгөрснөө би цусаар уйлаад ч дахин давтаж чадахгүйд хэргийн учир оршино.
Зөвхөн өнөөдрөөр амьдардаг манжлагатай сүрхий прагматик хүмүүс байдаг л даа.
Жишээ нь ?
Жишээ нь үү, Батууд байна. Баатарууд байна. Болдууд байна. Энхүүд байна. Дуусахгүй.
Гэхдээ бага насны романтик дурсамжаа хөөрөн хүүрнэлдэх жаргал. Түүнээсээ сэтгэлийн цэнгэл хүртэнхэн цаг нөхцөөх нь амьдалын бүр нэг томоос том амтат мэдрэмж юм даа.
Доор өгүүлэх зүйлийг Уншигч та юу гэж нэрлэх нь Таны хэрэг. Би бол өгүүллэг гээд нэрлэлээ. Та ч гэсэн өгүүллэг гэж бодоод уншчих нэг их гэм ч байхгүй, гарз гарахгүй биз ээ!
Инээх юу байх вэ, тэгээд цааш нь өгүүлсүгэй.
Миний аавын багш Мажиг гэдэг нэртэй эртний сэхээтэн хүн бий.
Эртний сэхээтэн гэдэг нь Оноре де Бальзак шиг атлаа цэргийн жанжин Фрунзе шиг хүнийг хэлнэ. Эд яг ХХ зууны Монгол улсын сэргэн мандалд итгэсэн хүмүүс. Тэгсэн ч учраас тэр сэргэн мандлыг бүтээсэн хүмүүс юм.
60-д оны эхээр Дундговь аймагт Сүхбаатар аймгийн уугуул Мажиг гэдэг хүн иржээ. Дээд боловсролтой хээнцэр эр. Чемоданыг богц гэх үү, авдар гэх үү гэж эргэлздэг хүмүүс байсан цагсан.
Мажиг багш Орос хэлэнд ус цас. Адуу малд орос хэл шигээ эр байж л дээ.
