Бодол эргэцүүлэл сургамж
- ISBN: 978-99973-2-981-3
- Хавтас: Зөөлөн
- Хэвлэгдсэн он: 2015
- Хуудас: 424
- Хэмжээ: 250*176мм
- Жин: 765
- Үлдэгдэл: Дууссан
РЕДАКТОРЫН ЗУРВАС
ЭНЭ НОМЫГ УНШААД ТӨРСӨН СЭТГЭГДЭЛ ГЭВЭЛ:
Нэгэн зүйл. Юмны учир жанцан, хүний хувь зохиол сонин юм. Д.Даваасамбуу Москвад Олон улсын харилцааны дээд сургуульд оюутан байхдаа заалгаж байсан эдийн засаг, санхүүгийн онол, эрдмээ одоо эх орондоо ШУИС-ийн Олон улсын харилцааны дээд сургуулийн оюутнуудад өөрөө зааж байгаа билээ. Номын бичлэг, өгүүлэмжийг ажвал, яг л оюутан шавь нартаа (өргөн утгаараа бол, залуу үеийнхэндээ) хичээл заагаад, чөлөөт ярилцлага хийгээд, дадлага, семинарыг нь хөтлөөд, заримдаа сздэвчилсэн лекц уншаад байх шиг санагдлаа. Ийм болохоор энэ ном эдийн засаг санхүүгийн асуудал судалж, сонирхож байгаа хэн бүхэнд, ажил бизнесийн замаар алдаж онож яваа хүн болгонд санаа сэхээ оруулах, сайн замыг олоход тун ч тустай бүтээл болжээ гэж хэлмээр байна.
Нэгэн зүйл. Зохиогч мэдсэн сурсанаа, эзэмшсэн мэргэжил боловсролоо, туулсан замын сургамж, туршлагаа өөрийн ажил амьдрал дундуур нийтгэн эрчилж, онол практикийн гаргалгаанд зангидан уяж бичсэнээрээ энэ номыг уншуургатай агаад ухаарал сэхээрлийн ундарга сайтай болгож чадсан гэж үзлээ. Чин үнэнээр хэлэх юм бол, санхүү эдийн засгийн мэдлэг нимгэн миний хувьд энэ номноос зөндөө зүйлийг шинээр ухаарч, олж мэдэж, одоо манай нийгэмд нүүрлээд байгаа эдийн засгийн, санхүүгийн хямралт байдлын уг үндэс, учир шалтгааныг улс төрийн нөлөөгүй толинд тусган задлан шинжилсэн судалгаа дүгнэлт, тэндээс ургуулан дэвшүүлж байгаа санаа оноо, санал сэдлүүд наанадаж айл гэр, хувь хүмүүсийн ажил амьдралд, угтаа бол төр засгийн түвшинд бодлого шийдвэр боловсруулагч эрхэмүүдэд тунч анхаарууштай, авч үзүүштэй, шийдэж хэрэглүүштэй, товчдоо бол ихээхэн үнэ цэнтэй гэж үзэж байгаагаа уншигч таны шүүлтэнд хандуулъя.
Нэгэн зүйл. Номын бүтэц өвөрмөц, угтуул бүлэг, хавсаргасан зүүлтээс зохиогч хувь хүний хувьд хэн болохыг таньж мэдэж болно. Бусад бүлгээс энэ хүн юу бүтээж, юу бодож, хүсч эрмэлзэж явдгийг олж харна. Алинд нь ч алт шиг санаа, сургамж элбэг дүүрэн.
Ер нь Д.Даваасамбуу өнгөрснийг өгүүлж байгаа хэрнээ өнөөдрийг, маргаашийг тусгаж ярьдагийг, энгийн жишээ баримтаар их том утга агуулга илэрхийлдэгийг олон жил хаяа залган амьдарч, хараа бараандаа ажиллаж явдгийн хувьд би сайн мэддэг бөгөөд түүний энэ чанар энэ номын бичлэг, өгүүлэмжийн аясад ч бас туссаныг уншигч та анзаарваас тухайн үг өгүүлбэрийн цаанаа чухам ямар санаа агуулагдаж байгааг өөрийнхөөрөө тайлан тунгаавал сонин сонин задаргаа хийж болно.
Нэгэн зүйл. Эцэст нь зориуд тэмдэглэн хэлэх гэсэн гол санаа буюу дүгнэлт гэвэл, энэ номонд боловсролын бүр тодруулвол, шинжлэх ухааны докторын зэрэг горилох зохиолын хангалттай эх материал агуулагдаж байна.
Мэдээж, системчлэх, баяжуулах, эрдэм шинжилгээний бичлэгийн хэв загварт оруулахаас эхлээд судалгааны төрөлжилт, сонголт дэс дарааг нарийвчлан чамбайруулах, түүнээс гарах дүгнэлт, санаа зөвлөмжийг оновчтой тодорхой (эзэнтэй хаягтай) болгох ажил хийгдэж таарна. Тэгээсэй гэж хүсч байгаагаа илэрхийлэн энэ номын эхэн хуудсыг нээж уншигч таныг урин залъя.
Профессор, доктор Дагвын Цахилгаан 2015 оны тавдугаар сарын 1
