НҮБ-ын Ерөнхий Ассамблейн 1999 оны шийдвэрээр, 2000 оноос эхлэн жил бүрийн 8 дугаар сарын 12-ны өдрийг "Олон улсын залуучуудын өдөр" болгон тэмдэглэж байхаар тунхагласан. Энэ нь залуу хүмүүсийн эрх ашгийг хамгаалах, үндэсний хэмжээний бодлого, хөтөлбөрийг залуучуудын оролцоотой боловсруулах, хэрэгжүүлэх, биелэлтийг дэмжиж ажиллахыг зорьсон байдаг.
Харин Монгол улсын хувьд 2003 оноос эхлэн жил бүрийн 8 дугаар сарын 25-ны өдрийг "Монголын залуучуудын өдөр" байхаар "Нийтээр тэмдэглэх баяр болон тэмдэглэлт өдрүүдийн тухай Монгол улсын хууль"-д зааж, албан ёсны тэмдэглэлт өдөр болгон өнгөрүүлдэг уламжлалтай болсон байна. Үүнтэй холбогдуулан 2014 оноос эхлэн Залуучуудын хөгжлийн сарын аяныг өрнүүлдэг уламжлал тогтжээ.
