Аавуудад зориулсан ном 20 хувь хямдарна.
Азхур номын их дэлгүүрээс " Дэлхийн номын өдөр"-ийг тохиолдуулан дараах номуудыг "ААВ"-ууддаа зориулан 2020-04-23 өдрөөс 25-ны өдрийг дуустал 20 хувь хямдруулна.
1. Гайхам үйлчилгээний НОУ ХАУ хялбар 68 арга
Энэ бол дэлхийн түвшний хэрэглэгчийн үйлчилгээг үзүүлж, хэрэглэгчдээ үргэлж сэтгэл ханамжтай байлгах, бусдаас ялгарах үйлчилгээг хүргэхэд шаардлагатай практик арга замууд, зөвлөгөө, стратегийг агуулсан ном юм. Уг номоор дамжуулан сүүлийн 4-5 жилийн хугацаанд шилдэг тэргүүний зохиогчид, хувиараа бизнес эрхлэгчид, хэрэглэгчийн үйлчилгээ, туршлагын мэргэжилтнүүд, дадлагажигч нартай хийсэн 150 ярилцлага, өөрийн судалгаа, туршлага дээр үндэслэн амьдралд хэрэгжүүлэхүйц, хэрэглэхэд хялбар 68 аргыг танилцуулж байгаа билээ. Энэхүү бүтээл байнга хувьсан өөрчлөгдөж байдаг үйлчилгээний сувгууд технологи, тогтолцоо, процессын талаар биш харилцаа, хүмүүсийн тухай тэр дундаа хэрэглэгчид, байгууллагын ажилтнуудын тухай ном юм.
2. Их хувь заяа
Номын зохиолч С.Удвал 1978 онд "Их хувь заяа"романаараа төрийн шагнал авчээ.
Баруун зүүнээ хөшиглөн хөндөлдөн дүнхийх Намнан уулын өвөр Цагаан бургас хавь хэдэн гэрийн гаднаас ачаатай хөтөлгөө морьтой хоёр хүн өглөө нарнаар гараад яаралгүй сажилна.
"Эр өсөж, эсгий сунадаг. Магсаржав чи одоо номын мөр хөөх цаг чинь боллоо. Номын мөр хөөнөө гэдэг чинь зүгээр л номын бараа хараад сууна гэсэн үг бишээ, мэдэв үү хө чи" гэж Сандагдорж гуай үгээ таслан унжруулан ярьж явахдаа хүүгээ нэг ёсондоо биеэсээ хөндийрүүлж байгаа нь тэр ажээ. Эцгийгээ тухтайхан суугаад удаахан шиг сургаал тавивал өвдөг сөхрөн хүлцэнгүй сууснаа "за бос" гэж хэлж гүйцэв үү үгүй юу год харайн үсэрч гардаг хүү одоо эмээлийнхээ бүүрэг ширтэн явахад эцэг нь өрөвдөвч сэтгэлээ барьж тэгэх тусмаа дуу нь нэг чангарч нэг намдан юм ярьж явна. Гол хөндийгөөр тарианы газар үе үе бараантаж нарийхан дэвсгэр гудас дэвссэн юм шиг, ногоон дээлийн нөхөөс шиг харагдана.
3. Карамазовын хөвүүд
Түгээмэл адал явдалт, ховорт тооцогдох гэмт хэрэгиг тухай роман. Ховор учир нь төрсөн эцгээ алсан хэрэг зохиолын гол зангилаа юм. Олон соёл иргэншилд төрсөн эцгээ алахыг хамгийн аймшигтай хилэнцэт нүгэл гэж үздэг. Энэ үзэшдлийн сэтгэл зүйн учиг маш нарийн. Хүн судлахыг зохиолчийн хамгийн чухал зорилт хэмээдэг Достоевский уг учгийг нэгэн айлын жишээгээ тайлж байна. Романы гол баатар эцэг Карамазов бол шунал тачаалаас авхуулаад аливаа муу авирын цогц болсон этгээд. Дөрвөн хүүүгийнх нь гурав нь хууль ёсных, нэг нь нэн хачин тавилантай нууц хүүхэд нь. Тэдний хэн нь ч эцгийгээ алсан байх магадлалтай. Отгон хүү Алёша нь илүү хүнлэг, зөв хүн боловч романы явцад Достоевский түүнд шударга үнэний эрэмбийн талаар нарийн ухаан шингээснээр тэр ч бас эцгээ хороочхож чадах, үгүйдээ л Дмитрий ахынхаа төлөө тийм нүгэл хийчхэж мэдэх хүн гэх сэжиг төрнө...
Хүний сэтгэл ариусахад ухамсартай сүсэг бишрэлийн ач тус цаглашгүй их. Достоевский "Бурхан байхгүй бол яаж ч авиргүйтсэн хамаагүй" гэж нэгэнтээ айлдсан бөгөөд энэхүү санаагаа романыхаа Христ бурхан газарт эргэж ирж буйг дүрсэлсэн нэг бөлөгт тусгасан буй. Энэ бөлгийг биеэ даасан бүтээл гэж үзэх нь ч бий.
4.Зүрхний хилэн I, II
Ж.Пүрэвийн Зүрхний Хилэн роман.Манжийн дарлалын үеийн Монгол орон, Манж ухаан Монгол ухаан хоёрын хоорондын ялгаа, Манж хэмээх гүрнийг өөртөө уусгаж чадсан Хятад шаахайтнууд, тэдний арга заль, Халхын болон Хотгойдын вангуудын гаргахаар төлөвлөсөн бослого, түүний үр дүн, тэдэнд хүч нэмж буй Ойрадын Амарсанаа болон эдгээр хүмүүсийн уриалгад нэгдэж, бослогод оролцож буй дарлал мөлжлөгөд нэрвэгдсэн Монголын ард түмний эр зориг, эмгэнэлт хувь заяаг тун чадварлагаар дүрсэлжээ. Эвтэй байхдаа хүчтэй гэж чухам ямархан үнэн үг болохыг, нөхөд заримдаа ноход болдогийн жишээг энэхүү зохиолоос уншиж болно.
Тухайн үеийн Манжийн хаан байсан Тэнгэрийг тэтгэсэн хэмээх хааны хорон санаа, башир аргад удаа дараалан хууртаж, жигшин зэвүүцсэн Монголын ард түмэн бослогод оролцоцгооно. Энэ үед Монголыг шашнаар нь барьж тогтоох аргын золиос болсон Ренчиндорж вангийн дүү хоёрдугаар богд Лувсандамбийдомэйний бослогод сэтгэлээрээ нэгдэж буй ч оролцож чадахгүйн зовлон болон үүнээсээ болж хорлогдож байгааг, Манж нарын Монголчуудыг өөртөө элсүүлэх аргууд болох эмс охидоо өгч худ ураг барилдах, цол хэргэмээр шагнах аргад хууртаж бие биенийхээ араас гэтэх араатан аятай авирлаж буй Монголоо алдсан Монголчуудын түүх ч мөн сөхөгддөг.
5. Дэлхийг өөрчилсөн эрдэмтэд
Хүн төрөлхтний аугаа түүх, гайхамшигт бүтээл, сая сая хүний амийг аварсан анагаах ухааны нээлтүүдийг гаргасан, урласан, зохиосон, нэр алдар нь дэлхий дахинд мөнхрөн үлдсэн суут эрдэмтдийг энэхүү ном танилцуулж байна.
Эрдэмтдийн тухай өгүүллийг цаг тооны дарааллаар байрлуулав. Үүнд эрдэмтний товч намта, үзэл онол, гол гол бүтээл амьдралын онцлох он жилүүдийг оруулж, нээлт бүтээлийн ач холбогдол, хувь нэмрийг үнэлж дүгнэн бичсэн. Мөн нэр томъёоны тайлбар хэсгийн хавсралт хэлбэрээр оруулж өгөв.
Эрдэмтдийг дэлхий нийтэд алдаршсан нэрээр нь оруулсан бөгөөд зарим нэг элбэг тохиолддог хувилбарыг нь хавсаргаж өгсөн болно.
