Хил хязгаарыг давсан хүмүүс
Нээлт хийгчдийн тухай өгүүлэх энэ номд анхаарахгүй байх аргагүй нэг сэжим бий. Тэдний сэтгэлийн гүнд нээлтийн анхдагч болох агуу нууц хадгалагдаж байдаг юм. Зэрвэс харахад энэ нууц их энгийн. Ердөө чин сэтгэлээсээ аливааг сонирхох эрмэлзлээс шалтгаалдаг. Гэхдээ энэ энгийн зүйл өөрийн гэсэн хэлбэлзэлтэй. Сонирхол мэдээж хэрэгтэй. Дурлан тэмүүлэх ч сайхан чанар. Эс тэгвээс хүссэн зүйлдээ яаж хүрэх Сальвадор Далигаар жишээлье. Энэ цагт шагшигдсан агуу зураач амьдарч байгаа цаг үеэсээ нэгэн зууны өмнө бүтээж туурвиж байсан мастеруудын уран зургийн, техникийн арга барилуудыг чадварлаг эзэмшсэн нэгэн. Өнөө цагийн тод хүн Марк Цукерберг гэхэд л бага залуугаасаа программчлалын хэлийг гаргууд эзэмшсэн нэгэн.
Амьдарч буй орон зай, орчноосоо хальж, хэдэн арван жилээрээ үргэлжлэх хамгийн амьд хувирамтгай зүйлийг бий болгохын төлөө тэмүүлэх хүмүүс бол нээлт хийгчид. Импрессионист зураач Клод Монэ гэхэд л нарны гэрлийг өөрийнхөөрөө нээсэн. Өдөр бүр байнга судалгаа хийж суусан психоанализийн эцэг Зигмунд Фрейд дотоод сэтгэл, оюун санааны бүдэг хөдөлгөөнүүдийг мэдэрч, үүн дотроос хамгийн гайхалтай хэлбэр дүрсүүдийг анзаарч чадсанаараа агуу нэгэн. Сансар судлаач, ирээдүй судлаач Стивен Хокинг хэрээсээ давсан ачааллыг умартан оддын тухай бодол руу тэмүүлсэн хүн. Энэ хүмүүст хэмжээлшгүй эр зориг байсан нь гайхал төрүүлэм.
Бодоод үз дээ. Урсгалыг сөрж алхах тийм амар билүү?
Хил хязгаарыг давж чадсан хүмүс урлаг, эсвэл мэдлэг нь тусдаа салбаруудыг өөрчлөөд зогсохгүй, өөрсдийгөө, биднийг, хүн төрөлхтний ирээдүйг ч өөрчилж чадсан юм. Үүгээрээ тэд бидэнд зам заагч луужин болдог. Үл мэдэгдэх зүйл рүү өөрийн гэсэн түүхийг бүтээн тэмүүлж, хэний ч мэдэхгүй, төсөөлөхгүй ертөнцийн хаалгыг зүрхэлж татсан тэд << Зорилго, тэмүүл, хийж бүтээцгээ>> гэж дуу нийлүүлдэг. << Мөрөөдөцгөө, мөрөөдлөө биелүүлцгээ, туршицгаа, асуудалд баяртайгаар хандацгаа, өөрийгөө эрж хайцгаа>> хэмээн уриалдаг. Хэрвээ та нэрд гарсан, нээлт нээлт хийсэн улсын эгнээнд орохыг хүсэж байгаа бол Стив Жобсын зөвлөгөөг уншаад үзээрэй.
Дэлхийг түүхийг өөрчилсөн агуу хүмүүсийн нэгд зүй ёсоор тооцогдох ноён Жобс << Таны цаг хугацаа хязгаартай. Тиймээс хэн нэгний амьдралаар амьдарч өөрт ногдсон багахан хугацаагаар үр дүнгүй өнгөрөөх хэрэггүй. Нэгэнт тогтчихсон уйтгартай хандлагад битгий авт. Бусдын туулсан замаар алхах хэрэггүй. Ийм амьдрад дэндүү уйтгартай. Дотоод дуу хоолойг тань хэн нэгэн шүүмжиллээ гээд ухарч няцах бүр ч дэмий хэрэг. Зүрх сэтгэл, зөн совингоо дагах эр зоригтой амьдрах нь таны хувьд цорын ганц, чухлаас чухал гарц. Таны үйлдэл ямар нэг байдлаар бусдад мэдээжийн, байдаг л зүйл мэт санагдах мэдэх юм. Үнэндээ таны хэн болохыг, юу хийхийг хүсэж буйг ч тэд гадарлаж байж болох. Тэглээ гээд таны талаарх бусдын бодол тэгтлээ анхаарах сэдэв биш. Таны хүсэл тэмүүллээс бусад нь хоёрдогч, нэг их анхаараад байхааргүй, байдаг л зүйлс гэдгийг битгий март.>> гэж хэлсэн байдаг. Та ч гэсэн энэ номын баатрууд шиг хил хязгаарынхаа зүг тэмүүлж, хил хязгаараа эзэгнэж, хил хязгаараа даван туулж болохгүй нь юу билээ.
