Энэ жилд илүү олон ном уншихын тулд яах вэ?
1. Өөртөө хэт өндөр зорилго бүү тавь
Та гаргууд уншигч биш л бол хэрээс хэтэрсэн олон ном унших төлөвлөгөө гаргасны хэрэггүй. Олон ном унших тухай бодсоор нэг ч ном уншиж чадахгүй байх тохиолдол бий. Тиймээс багаас эхэл. Жишээлбэл: сард нэг ном, өдөрт 10 хуудас гэх мэтээр өөртөө хэт ачаа үүрүүлэлгүйгээр хялбархан байдлаар эхлэх нь илүү үр дүнтэй. Хэрэв та сард нэг ном уншсан бол дараагийн номоо шуудхан шүүрээд ав.
2. Нормоо хадгал
Та арга барилаа олоод , амжилттай уншаад байвал түүнийгээ үргэлжлүүлэх хэрэгтэй. Хэрэв сард 2 ном уншдаг бол энэ тоогоо бууруулалгүй харин ч нэмэх хэрэгтэй. Нэмж чаддаггүй юмаа гэхэд 2 номоо тогтмол унших нь зүйтэй.
3.Эртхэн орхи
Нэг ном эхлүүлчхээд “Яагаад би энийг уншаад байгаа юм бол?” гэж өөрөөсөө асууж байсан л биз дээ. Тэгтэл санаа зоволтгүй бид бүгдэд нь л тохиолддог зүйл. Таалагдаагүй эсвэл ашиггүй ном унших гэж өөрийгөө хүчилж байхын оронд зүгээр л хаагаад, өөр нэгийг эхлүүл. Нэгэн зохиолч хэлэхдээ “ялагчид хэзээ ч зогсдоггүй” гэсэн нь ном унших тал дээр бол тохирохгүй урмын үг. Харин ч эсрэгээрээ таалагдаагүй номоо эртхэн орхих нь сайн номд зарцуулах цаг гаргаж өгөх юм.
4.Сэтгэл ханамж өгнө
Ном унших олон талын ашиг тустай гэж сонсож байсан л биз дээ. Тэгвэл та жишээ нь Жо Жо Мойес гэдэг зохиолчийн улаан фен байлаа гэж бодъё. Тэгээд та эхлээд тэр зохиолчийн Чамтай учрахаас өмнө номыг уншаад дуусахад, дараагийн цувралыг нь уншихыг хүснэ гэсэн үг. Цаашлаад төгсгөлийн дэвтрийг нь уншина. Үргэлжүүлээд өөр цувралыг нь хайж унших бүртээ мэдээж аз жаргал, сэтгэл ханамж авч байгаа байх. Уг нь нэг орчихвол гарч болдоггүй аз жаргал бол ном унших юм шүү дээ.
5. Биедээ байнга ном авч яв
Бидэнд ном унших цаг үргэлж олддог. Өглөө ажил руугаа явж байхдаа сонсдог ном сонсож болно. Эмнэлэгт цаг авсан бол хүлээх зуураа, хурал уулзалт эхлэхээс өмнө, заримдаа уйтгартай хурал дээр, ямар нэг зүйл хүлээх хэрэг гарвал гээд унших хугацаа бидэнд мундахгүй их гарна. Тиймээс л иймэрхүү сиймхийг үр дүнтэй ашиглахын тулд байнга ном авч явах хэрэгтэй. Киндэл байсан ч болно шүү дээ.
6.Дэмий үрдэг цагаасаа хугасла
Хэрвээ та өдөрт твиттер, фейсбүүк, кино үзэх зэрэгт 4 цаг зарцуулдаг бол тэр 4 цагийнхаа 2-ыг нь ном уншихад зориул. Гэхдээ эхлээд 2 цаг ном уншчихаад, дараа нь 2 цагийг кино үзэх зэрэгт зарцуулаарай.
7. Ямар нэг уралдаанд оролцох
Хамгийн зугаатай хийгээд ном унших урам зориг өгөх нэг зүйл бол номын клубүүд, номын дэлгүүрүүд, сайтын зүгээс зарладаг уралдаанд оролцох юм. Мэдээж шинэ болон хүмүүс ихээр сонирхож байгаа номуудаараа уралдаан зарладаг. Тиймээс шинэ сайхан номтой танилцаад зогсохгүй, шагнал хүртэл авах боломжтой. Цаашлаад улам илүү унших хүсэл төрөх ч юм билүү.
8. Тухтай орчин бүрдүүл
Аливаа зүйлийг хийхэд орчин их нөлөөлдөг учир уншилтад садаа болдог утас, зурагт зэргээ унтраагаад намуухан тухтай орчин бүрдүүлбэл илүү тустай. Уух зүйл ч хажуудаа тавьж болно.
9. Техник хэрэгсэл ашигла
Магадгүй байнга ном авч явах төвөгтэй санагдаж болох юм. Тэгвэл киндэл, сонсдог ном, айпад, ухаалаг утас гээд ном унших олон хэрэгсэл бидний гар дор байна. Эднээс өөрт аль тохиромжтойг ашиглах нь жилд илүү олон ном уншихад тусална.
10. Хуримтлал үүсгэ
Бид хэрэгцээ шаардлагагүй зүйлд их мөнгө үрдэг. Тиймээс амттан, түргэн хоол зэрэгт мөнгө зарж байхаар ном авахад тусгайлан зориулж хадгал. Хүн хичээнгүйлэн хадгалсан мөнгөөрөө авсан номоо заавал уншина шүү дээ.
11. Сэтгэлгээгээ өөрчил
Олон ном унших энгийн арга бол ном уншихыг бидний хийдэг зүйлсийн нэг гэж бодохоо болих юм. Харин түүгээр бид амьсгалж, хооллох хэрэгтэй. Ном унших нь хийх үйлдэл биш мэдрэх мэдрэмж. Сэтгэлийн цэнгэл, тайвшрал авах хамгийн шилдэг арга гэж нэгэн зохиолч хэлсэн байдаг.
12.Гүйлгэж унш
Энэ аргыг сонин сэтгүүл, интернэтээс нийтлэл уншихад ихэвчлэн ашигладаг. Номыг гүйлгэж уншихаас татгалзах хэрэггүй. Магадгүй уншиж буй номоо хурдан дуусгах, дараагийн номоо шалавхан эхлүүлэхэд тусалж мэдэх юм.
13. Олон ном зэрэг эхлүүл
Энэ арга хүн бүрт тохиромжгүй байж болохыг анхаараарай. Гэхдээ олон ном зэрэг эхлүүлдэш уншигчид бий. Бүр ном болгоноо өөр өөр газар уншдаг гээ. Орой унтахдаа, ажил дээрээ, утсан дээрээ, айпад дээрээ, машиндаа гээд тус бүрт нь өөр өөр ном уншина. Хэрэв энэ аргыг ашиглахаар шийдвэл хувь хүний хөгжийн, уран зохиолын, намтар гээд төрлийн хувьд ялгаатай номуудыг уншаад үзээрэй.
14.Байнга шинийг эрэлхийл
Аль дэлгүүрт ямар ном худалдаанд шинээр ирэх, нээлтээ хийх номуудад таны сонирхлыг татахуйц ном байна уу, энэ долоо хоногт шилдэг борлуулалттай номын жагсаалтад ямар номууд багтсан байна гээд байнгын мэдээлэлтэй байх хэрэгтэй. Шинэ ном унших сэдэл төрүүлнэ.
15. Аяллаар явахдаа унших
Аялах нь ном унших хамгийн тохиромжтой цаг. Эхлээд ном уншихад зориулж болох цагаа тооцоолох, жишээ нь онгоцны буудал дээр нислэгээ хүлээж байхдаа, хоол захиалаад хүргэж ирэх хооронд гэх мэтээр төлөвлөж болно. Мөн цахимаар ном унших гэж байгаа бол эхлээд номоо бүтнээр нь татаж авах хэрэгтэй. Учир нь очих гэж байгаа газар чинь вайфайгүй, эсвэл төлбөртэй интернэттэй байж болно.
16. Жагсаалтаа эргэж харах
Унших номын жагсаалтдаа нэмэхээр мянга мянган номоос эрж хайж, хэвлэлийн газруудын сайт эргүүлж тойруулж цаг үрж байна уу. Тэгвэл дуртай зохиолчийнхоо эсвэл хүндэлдэг улстөрчийнхөө санал болгосон номын жагсаалттай танилцаад нэг үзээрэй. Туршлагатай салбараа сайн мэддэг хүмүүс уншвал тохирох хамгийн сайн номуудыг гарцаагүй мэдэж байдаг учир чамд сайн зөвлөх болж өгнө. Мөн давхар цаг хэмнэнэ.
17.Бусдад уншсан номоо санал болгоорой
Хэрхэн сайн уншсанаа биш, ямар ном уншсанаа хуваалцаарай. Аяганы хариу өдөртөө гэдэг шиг найз чинь эргүүлээд чамд ном санал болгоно. Ингээд л дахин шинэ ном гарч ирснээр унших аялал чинь үргэлжилсээр байх болно.
18. Эхлэхдээ дараа нь унших номоо төлөвлө
Нэг ном эхлүүлэхдээ дараагийн унших номоо товлох нь эхэлж байгаа номоо дуусгах, дараагийн номоо хурдан эхлүүлэх сэдэл төрүүлнэ.
19. Унших тогтсон цагтай бол
Гэрийнхнийгээ босохоос 30 минут, унтахаасаа өмнө 30 минут зэргээр ном унших тогтсон цагтай болчихвол илүү үр дүнтэй байдаг. Унших тогтмол цагтай болсноор өдөр бүр унших болно.
20. Номын клубт элс
Бусадтай уншсан номынхоо жаргал зовлонг хуваалцах хэчнээн сайхан билээ. Хүсэл сонирхлоороо нэгдсэн уншигчид танд унших сэдлийг улам ихээр төрүүлнэ. Мөн олон сайн ном ч санал болгоно.
21. Тэмдэглэл хөтлөх, чангаар дуудаж унших
Олон нийтийн газар чангаар дуудаж унших нь тохиромжгүй ч энэ бол зохиолоо сайн ойлгох, номдоо ороход тустай. Мөн тэмдэглэл хөтлөх нь дүгнэлт хийх, зохиолчийн хэлэх гэсэн санааг илүү ойлгоход тусална.
