Уншигчаас ирсэн захидал : Тиймээ, Би нар байж
Би хүүхэд байхдаа их мяраалаг, жижигхэн нүдтэй охин байсансан. Төрөл садны ах эгч нар уулзаж цуглан суухдаа намайг их л гоёоор үргэлж ярина. Харин ээж нэг удаа " Миний охин өмнө их гоё инээдэг байж билээ. " Яг л нар шиг" гэж билээ. Тэр үед энэ үгийг би анх удаа сонсоогүй гэдгээ ойлгосон. Өмнө тэр хүмүүс энэ л үгийг дурсамжаа уудлан ярьсан. Харин одоо энэ үг сэтгэлд, тархинд хүрэх шиг ... Ойр дотны тэр хүмүүсийн дурсамжинд байгаа би хаана очоод төөрчихөө вэ? Хэрхэн өөрчлөгдсөн болоод тэд намайг дурсамжаасаа хайна вэ?
Нар... Нар гэж юу билээ?
Хорвоо ертөнцийг гэрэлтүүлдэг галт бөмбөлөг. Өөрөөр нарны аймгийн төв од, нарны аймгийн нийт массын 99,86%-ийг эзэлдэг. Нарнаас ирэх энерги нь дэлхий дээрх бүх амьд бодисыг тэтгэх ба фотосинтез болон дэлхийн цаг уур, дэлхийн уур амьгалд голлох үүрэг гүйцэтгэдэг.
Би яагаад нар гэж? Энэ асуултыг тээн амьдралын их далайд сэлүүргүй завинд зорчихдоо хэдэн зүйлээс ухаарал аван 30 настай золгохнээ.
Өөрөөсөө асуусан асуултын хариултыг олоход тусласан зүйлсийг сийрүүлвэл:
1. Хоёр лам голын эрэг дээр аяга угааж суухад нэг хилэнц хорхой усанд живэхийг харжээ. Тэр даруй нэг лам нь аягаараа хутган авч эрэг дээр гаргав. Ингэх зуураа хилэнц хорхойнд хатгуулчихав. Буцаж яваад аягаа угааж байтал нөгөө хорхой ахиад гол руу уначихав. Лам хорхойг аврахдаа дахин хатгуулав. Цус шүүрэх гарыг нь харсан нөгөө лам:
-Анд минь, ачийг мэдэхгүй бачлах ийм амьтныг ахин дахин аврах хэрэг байна уу? гэсэнд
-Хатгах нь хилэнц хорхойн араншин, хайрлах нь миний араншин шүү дээ гэжээ. / Агнистын гэгээ /
Гэхдээ би бусдыг хайрладаггүй гэж үү? ...
2. Хоёр лам хийд хүрэхээр голын урсгал даган явж байтал эмэгтэй хүний уйлах чимээ сонсогдов. Хартал хуримын хувцастай бүсгүй эрэг дээр уйлж суух бөгөөд царай нь нулимсандаа халтартжээ. Гол гатлахыг хүссэн ч даашинзаа норгочих гээд байсан нь тэр аж.
Лам хүн эмэгтэй хүний биед хүрэх хориотой ч нэг нь бүсгүйг ихэд өрөвдсөн тул нуруундаа үүрээд голын нөгөө захад гаргав. Бүсгүй ч мэдээж маш их баярлаж мэхийн ёсолж гэнэ.Түүнийг ирэхэд нөгөө лам нь ихэд уурсан: Чи яаж байгаа чинь энэ вэ? Биднийг эмэгтэй хүнд хүрэхийг хориглодог байтал чи бүр түүнийг нуруун дээрээ суулгалаа гэж үү? гэх нь тэр. Тэгээд ч зогссонгүй үргэлжүүлж гарав гэнэ ээ.Ууртай нэгнийхээ ийн үглэхийг харин өнөөх лам замын турш чимээгүй сонссоор явжээ. Дотроо шувуудын жиргээ, нарны илчийг мэдрэн, тэр тайвнаар алхаж байлаа. Тийнхүү шөнө гэртээ буцаж ирцгээсэн төдийгүй эхний лам тайван нойрсжээ. Гэтэл түүнийг нөгөө ламын дуу сэрээж орхив.Ингэхдээ "Чи яаж түүнийг үүрч чадав аа? Өөр хүн тусалж болох л байсан. Чи мөн дүүрсэн лам юм даа" гэж байна гэнэ. Нойрноосоо сэрж амжаагүй лам "Юун бүсгүй билээ? Хэмээн лавлахад "Чи чинь бүр мартаж орхино юу? Чиний үүрч голын нөгөө эрэгт гаргасан бүсгүй" гэх нь тэр. "Аан, тэр бүсгүй гэж лам инээвхийлээд " Би түүнийг гол гатлахад нь л үүрсэн шүү дээ. Гэтэл чи түүнийг одоо хүртэл тээсээр байна " хэмээн хариулжээ. / Зоримог эмэгтэй ном /
Тиймээ зөвхөн хайрлах хангалтгүй байж. Бусдад тусласан бол сайхан мэдрэмжээ авч үлдээд үйлдлийг сэтгэлдээ удаан бүү тээ. Эс бөгөөс хариу нэхэх хүсэл төрнө. Саар зүйлийн хажуугаар дуу аялан өнгөрөх чадвартай бай. Эс бөгөөс сэтгэлийн шаналалд унана гэдгийг ойлгож билээ. Үнэндээ би бусдыг хайрладаг, хүмүүст тусладаг ч ихэнхдээ дотроо түүнийг хадгалдаг байж. Мөн сөрөг зүйлийн хажуугаар чимээгүй өнгөрч ч чадахгүй үргэлж сэтгэлдээ шаналал хураадаг байжээ. Энгийндээ би одоо цагтаа амьдрарч чаддаггүй байжээ.
Энэ ухаарлын дараа би өөрийн асуултын хариултаа олсон гэж бодож байна уу?
- Үгүй дээ. Ахиад л болохгүй байлаа. Дутуу мэдрэмжүүд намайг тойрон эргэлдэнэ.
3. Удаан уулзаагүй нэг найзтайгаа уулзахаар болов. Тэр найз маань надтай л ижил. Сайн ээж, сайн гэргий. Их сургууль төгссөнөөсөө хойш 1 удаа ажил хийж байгаад гарсан. Тэр минь үргэлж л гэр доторх асуудал, ямар ажил хийж чадах эсэх гээд л мөн миний хайж буй зүйлийг надтай ярилцдаг нэгэн байсан.
Найзтайгаа уулзсан тэр өдөр өмнөх шигээ байсангүй. Нэг л өөр ...
Өөртөө итгэх итгэл, урам зориг, сайхан инээмсэглэл. Тэр минь байгаа бүхнээрээ гэрэлтэж цацарч байлаа.
Би сонирхсон, гайхсан, асуусан.
Тэр ингэж хэлсэн : Найз нь хийхийг хүссэн зүйлээ олсон. Түүнийгээ ч хийж байгаа. Бас мөнгө түүний хэрэглээг бодохоо больсон. Хүссэн зүйлээ хийгээд ирэхээр мөнгө тийм ч чухал биш болдог юм байна. Хийж буй ажлаасаа баяр баясал мэдрэхээс мөнгө түүгээр худалдан авч болох материаллаг зүйлсээс мэддэрдэггүй юм билээ. Ижил сонирхолтой хүмүүсийн хүрээлэлд байх чинь утга учиртай байдаг юм байна.
Орой гэртээ ирэхэд би урам зориг, итгнл найдвараар цэнэглэгдсэн байлаа. Надад дутаад байсан зүйл энэ байж. Дуртай зүйлээ хий. Сайхан зүйлс түгээгддэг юм байна.
Хэрэв тэр өдөр найзтайгаа уулзаагүй бол амьдралын бас нэгэн чухал зүйлийг хэдий болтол эрж хайх байсан бол? Хүн гэдэг дан ганц уншиж судлах биш хүн хоорондын харилцаанаас танин мэдэж ухаардаг юм байна.
Надад дахин нэг асуулт, бас сонголт хийх цаг ирсэн ...
Би сонгосон. Дуртай зүйлээ. Одоо бүх мэдрэмж өөр байна. Урам зориг, итгэл найдвар, аз жаргал энэ бүхэн дүр төдий биш, бие сэтгэлээрээ мэдэрч байна. Дотроо гэрэлтсэн хүн гаднаа ч мөн адил гэрэлтдэг юм байна. Тиймээс л нар шиг санагддаг аж. Нэгэнт би тэнгэрт оршоогүй болохоор дэлхийн гадарга дээр амьд бүхний харилцааг гэрэлтүүлэх, түгээх нэр юм байна.
Бид бүгд нар шиг байвал хорвоо дэлхий илүү амар амгалан аж төрөх болов уу?
Өөртөө хүсээгүйг бусдад бүү хүс өөртөө хүсэж байгааг бусдад хүс гэх сургаал үгээр захидалаа өндөрлөе.
Хайр таныг хаана ч, хэзээ ч гийгүүлэх болтугай.
Уншигч : Ж.Э
