Өсвөр насны охид хөвгүүдтэйгээ ярилцаж чадахгүй байвал энэ номыг уншуулаарай.
Өсвөр насны ОХИД, ХӨВГҮҮДИЙН #бараг_бүх_юмны_тухай ном
Хэрхэн эрүүл, аз жаргалтай өсвөр насыг өнгөрүүлэх вэ? Өсвөр насны охид хөвгүүдийн мэдэх ёстой, мэдэхийг хүссэн бүхий л асуултын хариуг энэ ном өгөх болно. Жишээ дурдан нэг бүлгийг онцолвол:
ЦАХИМ ОРЧИН ДАХЬ АМЬДРАЛ
Технологи бол амьдралын нэгэн гайхалтай хэсэг. Үүний ачаар найзуудтайгаа зураг хөрөг, бодол санаа, ур чадвар, тоглоом, хөгжим, шинэ санаа, дурсамжаа хуваалцаж байна. Бас интернэт үгүй сэн бол дэлхийн өнцөг булан бүрд суугаа хүмүүстэй холбогдож чадахгүй байлаа. Цахим орчин биднийг ямагт жаргалтай болгодоггүй. Найзуудынхаа амьдралыг нийгмийн сүлжээнээс хараад тэд чамаас хавьгүй илүү, амар хялбар амьдарч байна гэж бодож ч болох юм. Гэхдээ энэ нь үнэнээс зөрүүтэй байх магадлалтай, гял цал чамин зүйлс өрсөн дэлгүүрийн цонхтой адил хүмүүс цахим орчинд голдуу сайн сайхнаа дэлгэдэг. Найзууд чинь ч бас адил бодолтой яваа биз. Өөрийгөө бусадтай харьцуулах чамайг жаргалтай болгохгүй. Чи, чиний амьдрал ч давтагдашгүй бөгөөд цорын ганц билээ.
***Завсарлага авах нь***
Хурууны үзүүр хөдөлгөхийн төдийд хорвоо дэлхийтэй холбогдож чадах ийм цаг үед өсөж байгаа нь гайхалтай хэрэг. Чиний хүрч чадахгүй газар гэж үгүй, эрж хайгаад олж мэдэж болохгүй зүйл ч гэж бараг байхгүй. Тархи тэр бүх харилцаа холбоо, шинэ нээлтүүдийг хийх тун дуртай. Бас амсхийж, мэдээллүүдээ цэгцлэх чөлөө олгодог сул завсарлага авахад ч дуртай. Тиймээс хааяа дэлгэц болон интернэтээс холдож, эцэг эхийнхээ тогтоосон дэлгэцийн цагийн хязгаарыг баримтлахаа мартуузай. Аав ээждээ ч бас ингэхийг сануулж болно шүү! Хэрэв ухаалаг төхөөрөмж, утас, зурагтгүй өдрийг өнгөрүүлж чадахгүй юм шиг санагдах эсвэл хэрэглээгээ хязгаарлана гэхээс уур хүрч байвал том хүнтэй ярилцаж, дэмжлэг хүсэх нь сайхан санаа байж магад.
***Бод, бод бас дахин бод!***
Цахим орчинд аливаа нэг зүйлийг нийтэлж, эсвэл бусад руу илгээхийн өмнө сайтар эргэцүүл. Нэгэнт илгээчихвэл хэзээ ч буцааж чадахгүй. Хүсээгүй зүйлийг чинь цахим орчинд хүчээр хийлгэхийг хэнд ч зөвшөөрч болохгүй. Мөн тэнд нийтэлсэн агуулга үүрд үлдэх бөгөөд хэн ч нийтэд тараах боломжтой. Багш, эцэг эх, хожмын ажил олгогч тань одоо, эсвэл ирээдүйд олж харах зэрэг сөрөг үр дагавартай.
