[{"code":"monsieurbiz.html","data":{"content":"Энэхүү ном нь өөрийгөө таних, дотоод ертөнцөө сонсох, амьдралын жинхэнэ утга учрыг эрэлхийлэх 108 өдрийн ухамсрын аялал юм. Бид аз жаргалыг гаднах ертөнцөөс хайж, амжилт, эд хөрөнгө, нэр хүнд, бусдын үнэлэмжийн араас тэмүүлэхдээ өөрийн дотоод мөн чанар, сэтгэл зүрхний дуу хоолойгоо мартах нь бий. Харин энэ ном таныг түр зогсож, өөрийнхөө дотоод ертөнц рүү өнгийж, “Би хэн бэ?”, “Би юуны төлөө амьдарч байна вэ?”, “Жинхэнэ амар амгалан хаана оршдог вэ?” гэсэн мөнхийн асуултуудын хариултыг өөрөөсөө эрж олоход урьж байна.\r\n108 өдрийн энэхүү аялал нь өөрийгөө таних, дотоод шарх, дарагдсан мэдрэмжээ илрүүлэх, зүрх сэтгэлээ ариусгах, ухамсартай хооллох, эд материалын уягдлаас чөлөөлөгдөх зэрэг таван мөчлөгөөр дамжин үргэлжилнэ. Өдөр бүрийн бясалгал, эргэцүүлэл, бичгийн болон амьдралд хэрэгжүүлэх энгийн дадлууд нь уншигчийг алхам алхмаар өөрийн үнэнтэй нүүр тулахад чиглүүлнэ.\r\nБуддын гүн ухаан, ачит багш нарын сургаал болон зохиогчийн амьдрал, бясалгалын туршлагаас урган бүтсэн энэхүү ном нь төгс хүн болохыг бус, харин яг одоо, энд ухамсартайгаар амьдарч, өөрийгөө болон орчлонг илүү хайр энэрэлтэйгээр танин мэдэхийг уриална."}}]null
