Номын үндсэн агуулга нь, өөрсдийн ухаарсан туулсан бүхнээ залуу үе, үр хүүхэддээ бахдал дүүрэн хүүрнэж чадах аав ээж, өвөө эмээ байхын тулд заавал мэддэг, тунгаан боддог, ухаж судалдаг байх ёстой сэдвүүд буюу хүмүн байх, тэр дундаа хөх толботон монгол хүн байхын мөн чанар, монгол хүний бие, оюун, сэтгэлийг бүтээж байдаг эх дэлхий, монгол нутаг усны тухай, мөн бичиг соёл, үнэт зүйлсийн тухай ойлголтууд номын эхний бүлэгт багтсан бөгөөд энэхүү номыг уншсан хүн бүрт тухайн сэдвүүдийг гүнзгийрүүлэн судлах сэдэл санаа өгөхийг хүссэн юм.
Хүүхэд хүмүүжүүлж, төлөвшүүлэхтэй холбоотой бусад сэдвүүд нь өөр өөрийн ухаанаар үр хүүхдээ “хүний зэрэгт хүргэх”-ээр хичээж яваа хүмүүст арга болон билиг талын ухаан нэмэрлэх, дээр нь монгол уламжлалд үр хүүхдүүдээ хүмүүжүүлж ирсэн эрдэм ухаан, мөн эдгээр нь далд ертөнцөд ямар утга учир, холбоо хамааралтай байдаг тухай өнөөгийн эцэг эхчүүдэд хэрэгтэй байж болох санаануудыг оруулсан.
Ирж буй сэрэнги эриний шинэ нөхцөлд үр хүүхдүүдээ хэрхэн бэлдэх, танхимын сургалтаас гадна хүүхдийг сургаж хөгжүүлэх ямар арга зам, боломж байгаа тухай эцэг эхчүүдэд мэдүүлэх, шийдвэр гаргагчдад санаа дохио өгөх агуулгатай сэдвүүд багтсаны дээр шинэ нөхцөл байдалд эцэг эхчүүд өөрсдөө ч өөрчлөгдөж, сэтгэл оюунаа засан сайжруулж, ухамсрын төлөвшилдөө анхаарч байж шинэ цаг үеийн хүүхдүүдийг зөв залж чиглүүлж чадах тул сэрэнги ухамсрыг төлөвшүүлэхэд зайлшгүй мэдвэл зохих ухагдахуунуудыг багтаасан болно.
